Landpósturinn

Fyrr í kvöld skellti blaðamaður sér í Borgarbíó að sjá myndina From Paris with Love með John Travolta og Jonathan Rhys Meyers í aðalhlutverkum. Myndin er byggð á sögu eftir Luc Besson en handritið skrifaði Adi Hasak. Myndin fjallar um James Reece (Rhys Meyers), ungan mann sem starfar við bandaríska sendiráðið í París en hefur þá hliðarvinnu að vera lágt settur njósnari í bandarísku leyniþjónustunni, CIA. Hann dreymir um að hækka í tign innan leyniþjónustunnar og grípur því tækifærið þegar það býðst, til að starfa með Charlie Wax (Travolta), sem er óútreiknanlegur og skotglaður brandarakarl sem á svör við öllu.

Eftir fyrstu tíu mínúturnar fór blaðamaður að efast um að hefði verið góð hugmynd að fara á þessa mynd. Byrjunin var frekar hefðbundin kynning á persónunni Reece og hans högum en virkaði svolítið slöpp. Sem betur fór breyttist allt til hins betra þegar persónan Charlie Wax kom til sögunnar. Dularfullur og kjaftaglaður töffari á miðjum aldri, alger andstæða jakkafatagæjans Reece, en saman mynda þeir óborganlegt teymi.

Bæði Travolta og Rhys Meyers koma sínum hlutverkum frá sér fullkomlega þó svo að sá síðarnefndi falli örlítið í skuggann á stórleikaranum Travolta. Ekki er heldur hægt að setja út á leik Kasia Smutniak sem fer með hlutverk Caroline, unnustu Reece.

Handritið mætti vera betra á köflum en húmorinn og hasarinn í myndinni bæta það upp ásamt góðri leikstjórn Pierre Morel (Taken) og þegar upp er staðið er myndin frábær afþreying.

Blaðamaður mælir því hiklaust með henni