Confessions of a Shopaholic
Sambíóin hófu um helgina að sýna bandarísku gamanmyndina Confessions of a shopaholic. Undirrituð er ekki mikið fyrir „chick
flick“ myndir, eða „gelgjumyndir“ eins og það myndi útleggjast á íslensku, en vegna fábreytts úrvals kvikmyndahúsanna
í bænum fleygði hún sér í djúpu laugina.
Myndin er byggð á samnefndri skáldsögu eftir Sophie Kinsella og segir frá Rebeccu Bloomwood, blaðamanni og kaupalka í New York borg. Rebecca Bloomwood (Isla Fischer) á sér þann draum heitastan að vinna á uppáhalds tískublaðinu sínu, en þegar hún sækist eftir starfi á blaðinu nælir hún sér fyrir slysni í vinnu sem dálkahöfundur fjármálatímarits. Hjólin fara að snúast og ef ekki hefði verið fyrir kaupfíkn Rebeccu og illa innheimtumanninn hefðu draumar hennar líklega orðið að veruleika.
Confessions of a shopaholic kom skemmtilega á óvart. Myndin er hin ágætasta skemmtun og þessum 550 krónum var vel varið í spar-bíó. Innkauparáð kaupalkans Rebeccu eiga eflaust eftir að sitja föst í kolli þeirra sem nota kreditkortið óspart og undirrituð á eflaust eftir að hugsa sig tvisvar um næst þegar hún ætlar að kaupa kápu á kredit. Myndin er samt sem áður líkt og margar amerískar stelpumyndir mikil þvæla og ekki fyrir hvern sem er.
Meðal leikara í myndinni eru Hugh Dancy, Krysten Ritter, Joan Cusack og John Goodman.
-Elísa Arnarsdóttir
